Rektori me fytyrë kameleoni

PRISHTINË, 23 DHJETOR – Universitetit të Prishtinës, të premten, iu shtuan edhe 17 doktorë shkencash, por nuk dihet nëse ata janë doktorët e vetëm, pas rektorit Enver Hasani, që kanë jekur “procedura të rregullta të doktoratës”.

Të përkujtojmë se para një muaji Hasani ka shkruar në një email dresë, të cilin e kishte publikuar “Iliria Post”, se hëpërhë ai ishte i vetmi në Kosovës që ka studime të rregullta të doktoratës, duke lënë të kuptosh se asnjë studim doktorate I bërë deri para një muaji nuk ishte më i rregullt se i tiji. Këtë qëndrim Hasani ia ka shprehur një profesori dhe doktori të shkencave mjekësore në Uashington.

Deklarata e të parit të UP-së kishte ardhur pas një hulumtimi të bërë nga gazeta “Iliria Post”, ku është gjetur se ai nuk i është nënshtruar fare procedures së nostrifikimit të titujve akademikë të marrë jashtë vendit, e që me një udhëzim administrativ të Ministrisë së Arsimit, të Shkencës e të Teknologjisë (MASHT), obligohen t’I nënshtrohen kësaj procedure të gjithë individët që kanë mbrojtur tituj akademikë jashtë Kosovës.


Por, rektori duket të jetë i prirë për të bërë shfaqje kameleoneze, meqë shpeshherë ai di t’i ndërrojë fjalët. Ndryshe nga deklarata e mësipërme, të premten Hasani ka thënë se beson shumë në aftësitë e doktorëve të rinj të promovuar. Megjithëkëtë, rëndësia e doktoratës nuk duhet të absolutizohet, ka thënë ai, meqë “titulli doctor shkence tregon se profesorët kanë kaluar pragun minimal për avancim akademik”, për të porositur që ata duhet ta dëshmojnë veten me punën e tyre. Në ceremoninë e promovimit të doktorëve të rinj të shkencave, fillimisht për të 17 kandidatët janë dëgjuar të dhëna biografike dhe bibliografike nga dekanët e fakulteteve, ndërkaq, përfaqësuesit e Komisionit vlerësues, para të cilëve kandidatët kanë mbrojtur punimin e doktoraturës, kanë dhënë hollësi për secilin punim veç e veç.

Tutorët e kanë krahasuar punën e kandidatëve me standardet evropiane, duke përmendur këtu metodat e përparuara shkencore, të cilat janë përdorur edhe nga të promovuarit për doktor shkence në UP.
Ilir Tolaj, tashmë doktor shkence në lëmin e infektologjisë, tha se titulli i marrë është një shkallë e lartë e përgjegjësisë, si për ta arsyetuar gradën e marrë, po ashtu edhe për ta implementuar atë në punën profesionale.

“Shëndetësia gjendet në një pozitë shumë të rëndë dhe me punën tonë ne do të bëjmë përpjekje që ta ndërrojmë kahun e zhvillimit të shëndetësisë dhe të ofrojmë shërbime sa më cilësorë për qytetarët”, theksoi Tolaj, i cili doktoratës ia ka kushtuar hiq më pak se 10 vjet punë shkencore. Nuk janë të paktë doktorët e shkencave, të cilët doktoratës i kanë kushtuar vite të tëra pune.

Nëse vjen një doktor shkence në krye të UP-së dhe i jep të drejtë vetes të thotë se është i vetmi në Kosovë që ka studime të rregullta të doktoratës, nuk mund të kuptohet ndryshe veçse si gjendje alarmuese, në mungesë doktorësh të shkencave, ose në të kundërtën si fyerje e rëndë që Hasani u ka bërë gjithë doktorëve të shkencave, profesoratit, por edhe Universitetit të Prishtinës, i cili i ka dhënë këta tituj akademikë.

Të kujtojmë se Enver Hasani nuk ka bërë në MASHT nostrifikimin e titujve akademikë që ka. Kësaj procedure ai duhej t’i nënshtrohej, meqë ata i ka marrë në një universitet jashtë vendit. Dilema nëse Hasani i ka të rregullt këta tituj ose jo do të ekzistojë derisa ai ta ndjekë procedurën siç e ndjekin të gjithë ata që kanë mbrojtur titujt
jashtë vendit, pra deri në momentin që ai do ta ketë në pronësi certifikatën që lëshon MASHT-i për vlefshmërinë e këtyre titujve.


Doktorët e rinj të shkencave në UP

Sabri Rexha
Ibrahim Pashiq
Ramiz Hoti
Kasamedin Abdullahu
Shaip Kabashi
Muhamet Kelmendi
Rufi Osmani
Adem Haziri
Fatmir Dragidella
Ferid Koqani
Bejtullah Zeqiri
Ilir Tolaj
Milajete Shala
Hamit Mehmeti
Shyqri Kelmendi
Afrim Dushi

Nga: Besnik KRASNIQI