Shkup, 25 shkurt – Të gjitha institucionet e arsimit të lartë do të jenë të obliguara të respektojnë maturën shtetërore, si kusht për pranimin e studentëve të rinj, pavarësisht nëse janë të karakterit publik apo komercial. Matura, do të jetë çelësi me të cilin do të hapen dyert e studimeve, si në ato universitet që financohen nga shteti ashtu edhe në ato që janë investim privat Përfaqësues të disa universiteteve private, që arriti t’i kontaktoj “Lajm”, mbështesin reformën e maturën shtetërore si normë ligjore, të cilën do të duhet ta respektojnë të gjithë, nëse në Parlamentin e Maqedonisë do të miratohen ndryshimet dhe plotësimet në ligjin për arsim sipëror.

“Jam i mendimit se matura shtetërore duhet të jetë kusht për regjistrimin e studentëve në fakultet, kurse provimi pranues një formalitet”, thotë prof. dr. Abdurahuf Pruthi, nga Universitet Ballkanin i Shkupit. Madje, ky universitet, sa i takon maturës shtetërore, është një vit përpara universitete të tjera të Maqedonisë. “Të gjithë studentët nga Turqia që, vitin e kaluar, kanë regjistruar sundimet këtu posedojnë dokument se atje e kanë kaluar me sukses maturën shtetërore”, tregon Pruthi. Njëlloj, plotëson më tej ai, do të veprojnë edhe me studentët nga Maqedonia, kur matura të fillon të zbatohet si normë ligjore. “Jemi të obliguar që të sigurojmë studime të ligjshme konform ligjeve të vendeve nga vijnë dhe ku duhet t’ju pranohet diploma”, thotë Pruthi.
“Për regjistrimin e studentëve do të veprojmë në bazë të Ligjit dhe do të respektojmë të gjitha obligimet që dalin prej tij”, thotë Leon Bakaxhievski, zëdhënës i FON-it, Universitetit privat të shkencave humane. Ai, thotë se FON është në pritje të rekomandimeve që do t’ju bëhen nga Ministria e Arsimit dhe Shkencës (MASH) enkas me regjistrimin e studentëve për vitin 2008/2009. “Nuk jami të shqetësuar për këtë punë dhe as të befasuar, meqë në Parlament është një propozim-ligji, i cili i barazon universitete shtetërore dhe private, sa i takon maturës shtetërore”, thotë Bakaxhievski.
Për një qasje pak më liberale shprehen në Universitetin privat “American College”, në Shkup ku thonë se me reformat duhet të zgjerohet mundësinë e shkollimit, për të gjithë dhe jo për të vendosur barriera. “Nuk besoj se për shkak të provimit pranues ose të provimit pranues, studentët to mos kenë mundësi të regjistrohen diku” thotë Valon Saraqini nga “American College”, ndërsa shprehet i prerë se do të respektojnë në përpikëri ligjet, me të cilat pritet të rregullohet kjo çështje.

Nga: LAURA PAPRANIKU