Prof. Fehmi Agani pishtar i dijes dhe i lirisë

PRISHTINË, 8 MAJ- Janë bërë gjashtë vite që kur është vrarë nga forcat serbe Akademik Fehmi Agani, pishtari i dijes dhe i lirisë dhe njëri nga themeluesit e Universitetit të Prishtinës. Në shenjë të përkujtimit të veprës së tij janë shënuar një varg aktivitetesh këtu në Prishtinë. Nën patronatin e Kryetarit të Kosovës z. Ibrahim Rugova, para Fakultetit Filologjik u vu gurthemeli i përmendores së Akademik Aganit, ndërsa me nismën e Asociacionit Studentor të Shkencave Politike do të vendoset një pikturë në hollin e Fakultetit Filozofik. Profesor Agani ishte ndër kuadrot më të qmuar të politikës e shkencës në Kosovë.


Nën patronatin e Kryetarit të Kosovës, z. Ibrahim Rugova është vënë gurthemeli i përmendores të Akademik Fehmi Aganit, para Fakultetit Filologjik të Universitetit të Prishtinës. Kjo është bërë me rastin e shenimit të gjashtë vjetorit që kur forcat serbosllave vranë profesor Aganin, në një pritë të kurdisur.
Kryeparlamentari Nexhat Daci e ka vënë solemnisht gurthemelin e përmendores së të ndjerit prof. Agani. Në fjalën e rastit që mbajti z. Daci tha se “Kosova dhe populli i saj do të bëhen vend i popullit të lirë të Evropës. Jeta dhe vepra e Fehmi Aganit do ta ketë vendin dhe nderin në piemontin shqiptarë”.
Në ceremoninë e vënies së gurëthemelit të përmendorës së Akademik, Fehmi Aganit morën pjesë përfaqësues të institucioneve politike dhe shkencore të vendit, profesorë dhe dhe një numër i madh i studentëve.
Shkëmb Manaj studenti i cili pati guximin ta merrte një nisme të tillë tha se “prof. Fehmi Agani ishte njeri i madh i shkencës dhe politikës. Ideja ime dhe nisma studentore për ngritjen e shtatoress tregon qartë se rinia studentore e Kosovës çmon dhe nderon lartë figurën dhe vepren e Akademik Fehmi Agani”. Në emër të familjes Agani këtë nismë e përshendeti Mentor Agani, i biri i të ndjerit, i cili lavdëroj nismen e studentëve.
 
Në anën tjetër Asociacioni i Studentëve të Shkencave Politike (ASSHP), ka marrë një iniciativë për të vendosur një pikturë të Prof. Fehmi Aganit në hollin e Fakultetit Filozofik. “Vendosja e pikturës së Prof. Aganit, bëhët për shkak të kontributit të tij, në sferën shkencore dhe universitare, përkushtimit të tij për mbrojtjen e universitetit që nga themelim i tij, e deri në ditët e fundit të jetës së tij” thuhej në një komunikatë të ASSHP-së e ardhur në redaksinë tonë. Gjithashtu në të thuhej se projekti në fjalë përkrahet edhe nga  Familja e Prof. Aganit, Departamenti i Shkencave Politike dhe Administratës Publike, Departamenti i Sociologjisë, Dekanati i Fakultetit Filozofik. Gjithashtu, këtë ide e mbështesin edhe strukturat më të larta të UP-së, me ç’ rast donator i këtij projekti do të jetë Rektorati i UP-së.
 
Nga: Besnik KRASNIQI