UPSUP e konsideron Qeverinë si fabrikë problemesh dhe e paralajmëron me radikalizim të situatës


PRISHTINË, 21 TETOR- Me anë të një letre të ardhur në redaksinë tonë Unioni i Pavarur i Studentëve të Universitetit të Prishtinës ka apeluar për të dytën herë tek institucionet vendore dhe ato ndërkombëtare në Kosovë, që këto institucione të përshpejtojnë zgjidhjen e krizës në arsimin kosovar. “UPS-UP me shqetësim të madh po e vështron situatën kaotike të krijuar pas shumë ditë greve që ka kapluar Universitetin e Prishtinës, si pasojë e neglizhencës, joseriozitetit dhe paaftësisë së ekzekutivit të Kosovës për t’i zgjidhur problemet në arsimin e të gjitha niveleve”, thuhet në letrën e kësaj organizate.

UPSUP konsideron se “Kostoja e humbjes së 20 ditëve mësim, është shumë më e madhe se sa realizimi i kërkesave të mësimdhënësve për rritjen e pagave dhe zbatimit të kontratës kolektive, ngase Kosova është vend i cili po përgatitet të fitojë statusin e shtetit të pavarur dhe më pas integrimit në familjen evropiane, kështu që krizat e tilla rrezikojnë proceset politiko-shoqërore në vend të cilat reflektojnë situata të palakueshme për të ardhmen e Kosovës”. Në kontekst të kësaj organizata më e vjetër studentore e UP-së, këtë apel ua ka drejtuar të gjitha institucioneve relevante, me qëllim që këto të fundit të marrin iniciativë për dhënien fund krizës së shkaktuar nga futja në grevë të përgjithshme e mësimdhënësve.
Gjithashtu, Unioni i Pavarur i Studentëve konsideron se Qeveria e Kosovës nuk po dëshmon vullnetin e mirë për zgjidhjen e këtij problemi dhe, sipas tyre, është kthyer në fabrikë problemesh, duke shndërruar misionin e tyre të shenjt, në mision mashtrues (disa zyrtarëve të Qeverisë) andaj kanë kërkuar: “Zgjidhje urgjente të kësaj problematike (plotësimin e kërkesave të mësimdhënësve); Të dalin para organeve të drejtësisë ata që shkaktuan tërë këtë kaos, me të cilin paralizuan inteligjencën dhe jetën arsimore në vend, për më se 20 ditë!; Fund lojës me dinjitetin e profesorëve dhe studentëve!”.
“Në të kundërtën Qeveria mund të përballet me radikalizim të situatës e cila më së paku i duhet Kosovës në pozicionet politike në të cilat gjendet aktualisht”, thuhet në letrën e ardhur në redaksinë tonë nga Zyra e Informacionit të UPSUP-së e nënshkruar nga Feim Maliqaj.

Nga: Besnik KRASNIQI